22.8.13

අවංකයා සහ වංකයා..


මේ කතාවත් කිඹුල්ලු දෙන්නෙක්ගේ කතාවක්....
හැබැයි මේ නිබුල්ලු දෙන්නා අහසට පොලව වගේ වෙනස්ම වෙනස්.
පුදුමෙනුත්,පුදුමයි එකම කුසෙන් එකම විටෙක මෙහෙව් වෙනස් උන් දෙන්නෙක් මේ ලෝකයට උපදිනා එක නම්....
එකෙක් පුදුමම ලෝකෝත්තර අන්ඩපාලයෙක්.අනිකා බොක්කේම අවංකයෙක්.කුකුලු පැටියෙක් තරමටම අහින්සකයෙක්...
දඟයාට මේ කිබුල්ලු දෙන්නා හම්බ වෙන්නේ දඟයාගේ ඔෆීසියෙදි.
අන්ඩපාලයාගේ නම බානුක.අවංකයාගේ නම සානුක.
ඔෆීසියෙදි සානුකයා "සානු" නමිනුත් බානුකයා "බානු" නමිනුත් සැමදෙනාම ආදරෙයෙන් ඇමතුවා...
මුලින්ම මේ ලෝකයේ එලිය දකින්නට නියමිතව සිටියේ සානුවා උනත්,බානුවා එම අවස්තාවේදීද සානුවාව රවටා, කලින් මෙලොවට පැමින අයියා වු බව,මුන් දෙන්නා ගැන දන්නා කවුරුත් දන්නවා.... :P
මේ නිසාම වෙන්න ඇති අවංකත්වයේ සන්කේතය ලෙසට සානුවාවද වංකත්වයේ සන්කේතය ලෙසට බානුවාවද කවුරුත් නම් කලේ..
දඟයා මුලින්ම කියන්න යන්නේ සානුකයාගේ අවංක බව ඔප්පු වෙන කතාවක්.
දඟයා අතුලුව යාලුවෝ පිරිවරට දවසක් යන්න සිද්ද උනා කලමනාකරන පුහුනු කදවුරකට.මේ පුහුනු කදවුර තිබුනේ U.K වල.....
(U.K කීවාට United Kingdom නම් නෙවේ ඕන්....දඟයා ඇතුලු පිරිවෙර ගියේ උස් වැටකෙයියාවට....)
මේ පුහුනු කදවුර දින තුනක් පුරාවට පවතින බවට දන්වා එවා තිබූ නිසාත්,පුහුනු කදවුර පවත්වන නිවාඩු නිකේතනයේ රාත්‍රියේ නැවතීමට සිදුවන නිසාත්,සියලුම දෙනා එකම වන්ඩියක යාමට තමයි සැට් උනේ...
ඒ දිනවලදීම සානුවාද හා..හා..පුරා කියා වන්ඩියක්(කාර් එකක්)මිලට ගෙන තිබුනා.(රටටම නය වෙලා තමයි මේකා මේක ගත්තේ නම්..)
රථයක් මිලට ගත්තද, ඒ වන විටද රථගාය පහව නොගිහින් තිබුන නිසා සානුවා ස්වකැමැත්තෙන්ම අලුත් කාර් රාජයා අපගේ ප්‍රවාහන මාධ්‍යය විය යුතු බවට නම් කලා.
කලමනාකරන පුහුනුව පවතින දිනවල රාත්‍රියේ,දෙවරක් පෙරූ දියරයන්ගෙන් හෝ වසර ගනනාවක් පදම් කල දියරයන්ගෙන් මිනිසුන් සිහි නැති වෙනා අන්දම ස්වකැමැත්තෙන්ම අප අත්හදා බලන නිසාද,සානුවා දෙවරක් පෙරූ දියර බාවිතා නොකරන නිසාද සියලුදෙනාම සානුවාගේ කාර් රථයේ යාමට එකෙන්ම කැමති වුනා.
කලමනාකරන පුහුනුව උදයේ හත පමන වන විට ආරම්බ වන බව දන්වා එවා තිබූ නිසා සහ මෙවන් පුහුනුවකට පරක්කු වී සහබාගි වීම තුලින් වන නින්දාව දන්න නිසාද,පුහුනුව පවතින දිනට පෙර දින හවස දෙකට පමන දඟයාත්,සානුවාත්,බානුවාත් තවත් පාප මිත්‍රයෝ දෙදෙනෙකුත් ගමන යාමට පිටත් උනා.
ඉහලින් එවා තිබු උපදෙස්වලට අනුව පුහුනුව පැවැත්වෙන හෝටලයට යන විටද,අත් දෙකම වැසෙන ලෙසට අත් දිගට ඇද,බෙල්ල සිර වන ලෙසට ටයි පටියක්ද බෙල්ලට තද කර,දිලිසෙනා ලෙසට කප්ලින් පැලද මහත්මා විලාසයෙන් තමයි ගමන යන්න පිටත් උනේ...(ඇත්තම කීවොත්නම් අපි තරම් මහත්+හොරු,ඒ කියන්නේ මහා හොරු ටිකක් නම් මුලු ඔෆිසියටම හිටියේ නෑ...)
පුහුනුව පවත්වන නිකේතනයට ඉක්මනින් ගොස් මූන පෙන්නා,නමට එක දමාගෙන,ලබාදෙන කාමරයක පදින්චිව,ඉක්මනින්ම පදම් කල පානයන් පානය කිරීමට තිබු බලවත් ආසාව නිසා,දඟයා සහ යාලුවන් දෙදෙනා කාර් එක ඉක්මනින් පැදවීමට සානුවාට මරනීය තර්ජන එල්ල කරමින් තමයි ගියේ. 
සානුවා හික්මුනු ඩයිවරයෙකු උනාට,තමන්ගේ පනට ඇති ආසාව නිසාම වාහනයේ වේගය පැයට කිලෝ මීටර අසූවක පමන වේගයෙන් තමයි ධාවනය කලේ.(නැතිනම් අපෙන් මැරුම් කනවානේ...)
කරුමෙක මහත.....අපිටමයි වෙන්නේ... :(
පොලිස් මාමලා දෙදෙනෙක්ගේ උකුසු ඇසට අපගේ වේගය අසු වී,වාහනය නතර කිරිමට ලැබු උපදෙසට අනුව කාර් එක  නතර කිරීමට සානුවාට සිද්ද උනා..
අපි කාර් එකෙන් බසින්නට උත්සහ කිරීමටත් ප්‍රතම,කාර් එක ලගට ආ පොලිස් සාජන්වරයා,අප දෙස බලා....
"දොස්තර මහත්වරු හදිසි ගමනක් යන ගමන්ද"යනුවෙන් අපෙන් ඇහුවා..
(කාර් එක සානුවා අරන් තිබ්බේ ඩොකෙක්ගෙන්.ඒ නිසා කාර් එකේ ඩොක්ටර් කාර් පාස් එකක් අලවා,ඊට උඩින් කලු ටින්ටඩ් කොලය අලවලා තමයි තිබුනේ..
අනික අපිත් දොස්තර මහත්වරු වගේනේ හිටියේ.නලාව විතරයි අඩුවකට තිබ්බේ. :D)
කාර් එකේ විදුරුව පාත් කර අමාරුවෙන් බෙල්ල එලියට දාගත් බානුවා...
"ඔව්..ඔව්..මේ හදිසියේ යන ගමන්..."කියලා කිව්වා..
පොලිස් සාජන්වරයා රියදුරු අසුන පැත්තට  පැමින..
"අනේ සමාවෙන්න ඩොක්ට...හදිසියේ ඔපෙරේෂන් එකකට යන ගමන් වෙන්ටෑ...ලයිෂන් බලන්න ඕනා නෑ..මහත්තයලා පරිස්සමින් යන ගමන යන්න..."කියලා කිව්වා..
සාජන් ඩ්‍රයිවින් සීට් එක ලගට එන විට වෙව්ලන්නට ගත් සානුවා සාජන්ගේ එම වචන කීපය ඇසීමත් සමගම ජොලියෙන් ජොලියට පත්ව....
"සාජන් රාලහාමි...බොහෝම ස්තූති...හැබැයි ඉතින් කාර් එකේ ඩොක්ටර් පාස් එකක් අලවලා තිබුනාට,අපි ඩොක්ටස්ලා නම්  නෙවේ..."කියලා කිව්වේ නැතෑ....
කුජීතයි...හයියො...සල්ලි කීවාලු...
කාලා වරෙන්කෝ...අපිට පරිස්සමින් යන්න කියු පොලිස් රාලහාමිලා ...
"හා..එහෙමද? කාගෙද වාහනේ...මොකද මේ මෙච්චර වේගයෙන් මැරෙන්නද යන්නේ,ගන්නවාලා ඩ්‍රයිවින් ලයිශන් එක....තමුසෙලා කාර් එක හොරෙන් උස්සන් යන ගමන්ද? @#$%&!  "බ්ලා..බ්ලා....බ්ලා....
තත්වය සෝචනීයයිලු....
අවසානයේ සියලුම දෙනාගේ අයිඩින්ටි කාරඩ් පරික්ෂාවටද ලක්ව,දඩ කොල කිහිපයකුටද උරුමකම් කියා,පොලිස් ස්තානයට ගොස් ඩොක්ටර් පාස් එකද ගලවා,වාහනයේ ටින්ටඩ් සියල්ලද ගලවාගෙන පැය දෙකක් පමන ප්‍රමාදව ආපසු ගමන යන්න පිටත් උනා.....ඕන් ඔහොම තමයි සානුවාගේ අවංකමේ,සහ සත්බාවයේ ස්වබාවය.... :)
හැබැයි ඉතින් රෑ,.වසර ගනන් පදම් කල බීම බොන වෙලාවේ සිට පහුවදා උදය වෙනකන් සානුවාට ජීවත් වෙන්න වුනේ නම් ඇදුම් නැතුව තමයි...
ඉතින්...නැන්දේ මාමේ...අයියේ,අක්කේ...නන්ගියේ,මල්ලියේ...දඟයාගේ කතා අසාගෙන සිටින ඔබලා හට දඟයා ඊලගට කියන්නේ බානුවාගේ සත්බාවයවංකබාවය,කපටිකම,එහෙමත් නැත්නම් තැනට සුදුසු නුවන ලෝකයට හෙලි උන අවස්තාවක් ගැන.
පසුගිය කාලයේ අපේ ඔෆීසියේ ලොකු පුටුවේ ඉන්නා හාදයාගේ රියදුරු මහතා පපුවේ හට ගත්තා වු කඩියෙක් හපනවාට සමාන වේදනාවක් නිසා කලුබෝවිල රජයේ රෝහලට ඇතුලත්ව හිටියා.යන එන ගමන් ලොකු මහත්තයා,කම්මැලිකම යාමට රියදුරු මහතාගේ පොඩි කේලමක් දෙකක් අහන බව දන්නා නිසා ඔෆීසියේ සියලු දෙනාම තමගේ නම ලොක්කාට බබලවා ගනු සදහා මේ රියදුරු මහතාව බැලීමට ගියා...
ඉතින් අපේ බානුකයාද ඌගේ අති ජාත මිත්තරයෙකුත් සමග,ලොක්කාගේ රියදුරු උන්නැහේ බලන්න ගියාලු.හැබැයි මේ කට්ටුව ඉස්පිරිතාලයට ගාටලා තියෙන්නේ අවෙලාවේ.ඒ වෙලාවට ලෙඩ්ඩුන්ව බලන්න දෙන්නේ නෑලු.ඉස්පිරිතාලයට ඇතුලුවන ඇම්බියුලන්ස් එකකට රෝහලේ ගෙට්ටුව ඇරිය මොතොතක,තමන්ගේ මෝටර් සයිකලයද  ඇම්බියුලන්ස්  එක පසු පසින් රෝහල තුලට ඇතුලු කොර ගත් බානුකයා,තමන්ගේ පසු පසින් එලවා ගෙන එන සිකුරිටි රාලහාමිට නොපෙනෙන්නට තමන්ගේ සයිකලය දොස්තර මහත්තැන්ලාගේ කාර් පාර්ක් එක තුලට ඇතුලු කලාලු. ;)
බයිසිකලය පසුපසින් හැල්මේ කිලෝමීටරයක් පමන දිව ආ සිකුරිටි රාලහාමිගේ ඇස් වලින් සැගවෙන්නට හැබැයි බානුවාට බැරි වෙලා.තමන්ට දුන් කට්ටේ පවර් එකටම මලපැනගෙන :ph34r: සිටි රාලහාමි..
"මේ... ඔතන දොස්තර මහත්තයලාගේ වාහන පාර්ක් කොරන තැන.ගන්නවාලා ඔය කබල් බයිසිකලය ඔතනින්.අනික මේ වෙලාවට ලෙඩ්ඩු බලන්න දෙන්නෙත් නෑ.දැන් දොස්තර මහත්වරු එන වෙලාව.යනවලා මෙතනින් ඔය බයිසිකල් කටුවත් අරන්"කියලා කීවාලු.  :o
සික්කා කියු කිසිවක් තමන්ට නොවේ වගේ සත පහකට ගනනකට නොගත් බානුකයා,ඌගේ ටයි එක සහ ඌව හොදින් පෙනෙන ලෙසට හෙල්මට් එක සහ ජැකට් එක ගලවා...
"දැන් මොකක්ද ප්‍රශ්නය?" කියා ඇහුවාලු.
බානුවාගේ පෙනුම දැක ටිකක් පමන බය වුන සිකුරිටි රාලහාමි
"නෑ..මහත්තයා...ඕක දොස්තර මහත්තයලා කාර් නවත්තන තැන.ඔතන අනිත් අයගේ බයිසිකල් නවත්තන්න දෙන්නේ නෑ" කියලා කිවාලු.
සිකුරිටි රාලහාමිගේ මුහුන  දෙස එක එල්ලේ බැලූ බානුකයා,හොද හුස්මක් ගෙන...
"ඇයි .....ඩොක්ටර්ස්ලට හදිසියකටවත් බයිසිකලයක එන්න බැරිද ?"කියා ඇසුවාලු. .. :P
බානුවා දිහා ඇස් ලොකු කරගෙන ටික වෙලාවක් බලා සිටිය සිකියුරිටි උන්නැහේ...
"සමාවෙන්න දොස්තර මහත්තයො...මම හරියටම ඇදින්නේ නෑනේ"කියා ආපසු යන්න ගියාලු. :D

No comments:

Post a Comment

Related Posts Plugin for WordPress, Blogger...