දගකාරිට දුන්න පෙම් කොලය...

මේක දගයා චුට්ටි කාලේ උන චුට්ටි කතාවක්...

දගයා විස්ස විජ්ජාලයේ යන්න (අවුරුදු 20දි විජ්ජා ඉගෙන ගන්න යන තැන ) ප්‍රාර්තනා කරන කාලේ,නුගේගොඩ පලාතේ ටියුසන් කලාසියකට ගියා විස්ස විජ්ජාලයට පාර කපා ගන්න....

ඔය කැලෑසියට ආවා දගයාගේම වයසේ දගකාරියෙක්....

ඔය දගකාරිව දැකලා දගයාට දගයාගේ සිත මෙල්ල කොර ගන්න බැරි උනා.දගයාගේ මෙව්වා එක මෙව්වා උනා....

කුලුදුලේ හදවතේ හට ගත්ත මෙව්වා හැගීම දගකාරිට කියාගන්න,දගයා නොසෑහෙන්න කල්පනා කොලා....

දින, සති ගනන් කල්පනා කල දගයාගේ කට්ට මොලයට, මාසෙකට විතර ඇවෑමෙන් පට්ට අදහසක් ආවා.

දගයා ක්‍රියාත්මක උනා...

ලස්සන මල් කොලයක්(සෙනෙහෙ කඩදාසියක්)ගත්ත දගයා කොලයේ මුතු අකුරෙන් මෙහෙම ලීවා...

"මම ඔයාට කැමති. ඔයා මට කැමතිද? ඔයා මට කැමතිනම් මේ කොලේ මොනවා හරි ලියලා මට ආයේ එවන්න. නැත්තම් මේ කොලේ පොඩි කරලා ජනේලෙන් විසි කරන්න"

තම කුලුදුල් පෙම්කොලය අතින් අතට යවමින් දගකාරි අතටම යවපු දගයා,...දගකාරිගේ ක්‍රියාකලාපය දිහා බලාගෙන හිටියේ,ආයෙමත් නුගේගොඩ පලාතකටවත් එන්න නොලැබෙන වස ලැජ්ජාවකට තමන්ට මුන දෙන්න වෙයිදොයිදත් කියන බයත් හිතේ තියාගෙන.

නමුත් දගයාගේ හිතේ බලාපොරොත්තු කන්දක් නන්වමින් වුනේ ශෝයිම ශෝයි වැඩක්.

සෙනෙහෙ කොලය අතට ගත්ත දගකාරි ඒක අරන් කියවලා,...දගයා දිහා බැලුවා.

දගයත් ඒ වෙලේ, දගකාරි කරන්නේ මොකක්ද කියලා බලන්න දගකාරි දිහාවටම ඇස් කරකවාගෙන හිටියේ....

$*&#$@************

තරු දහදාහයි,එක හදයි....

දගකාරිගෙයි,දගයගෙයි ඇස් එකකට එකක් සැට් උනා...

දගයාගේ ඇගම හීතල වෙලා ගියා...

නමුත් දගයාට කන් දෙකෙන් දුන් පිටවෙනවා වගේත් දැනුනා....

හුස්ම හිර වෙලා ප්‍රානය නිරුද්ද වෙන්න ඔන්න මෙන්න කියලා තියෙද්දි,දගකාරිගෙ මුහුනේ සිනාවක් ලාවට මතුවෙනවා දගයා දැක්කා...

දගකාරිගේ ලස්සන ඇස්  දගයාගේ පොල් ගෙඩියක් වගේ රවුන් මූනෙන් හෙමින් ඉවතට ගියා...

වයින් බෝතල් බාගයක් බීලා,ගන්ජා සුරුට්ටුවක් උරලා,ගොල්ඩ් ලිෆ් කොට 5ක් බීපු ගානට විදුලිය කෙටිල්ලක් දගයාට දගයාගේ ජීවිතයේ පලමු පාරට දැනුනා....

දගකාරි,දගයා යවපු සෙනෙහේ කොලයේ මොනවාදෝ ලියනවාත්,කොලය ලස්සනට නවලා ආපහු දගයාගේ පැත්තට එවනවාත් දගයාට පෙනුනේ,දගයා අහසේ පාවෙන වෙලාවේ කියලා කීවොත් ඒය තක්කෙටම හරි කතාවක්....

කොලය දගයා වෙතට ආපහු එන විනාඩියක පමන කාලය,කල්ප කාලාන්තරයක් විදිහට දගයාට දැනුනත්,එම කල්පය කාලය තුල දගයා,දගකාරි සමග හිතින් බොහොමත්ම දුර ගිහින් තිබුනා....

හවසට දගකාරියව ගෙවල් ලගටම ඇරලවන සැටිත්,138 බස් රාජයාගේ අවසන් අසුනේ සිට පෙම් බස් තෙපලන හැටිත් සිතේ මවමින් සෙනෙහෙ කොලය දිග ඇරිය දගයා, අවසන් ගමන් නොගිහින් මෙලොව තනි වුනේ දගයාගෙම කරුමෙකට කියලයි දගයාට දැනුත් දැනෙන්නේ....

දගයාගේ කරුමක්කාර දෑහට කදුලු අතරින් පෙනුන පිලිතුර දගයා කියවුයේ ඇහේ කදුලු අතිජාත මිත්තරයන්ට නොපෙනෙන්න පිස දමමින්...

Sorry....මන් ඉන්න තැන ජනේලය වහලා....